Frakkar unnu Króata, 34:32, í milliriðli Íslands á Evrópumótinu í handknattleik karla í Lanxess Arena í kvöld og hafa þar með fullt hús stiga í riðlinum, fjögur. Króatar hafa eitt stig og hafa m.a. misst Austurríkismenn upp fyrir sig en þeir hafa þrjú stig eftir sigur á Ungverjum fyrr í dag.
Staðan var jöfn í hálfleik í viðureign Frakka og Króata, 17:17. Frakkar voru lengst af öflugri í síðari hálfleik. Leikmenn króatíska liðsins börðust eins og ljón til loka og náðu að minnka muninn úr þremur mörkum í eitt. Nær komust þeir ekki.
Dika Mem skoraði sex mörk fyrir franska landsliðið. Nikola Karabatic var næstur með fimm mörk. Zvonimir Srna var markahæstur hjá Króötum með sex mörk. Igor Karacic, Mateo Maras, Luka Klaricea og Marin Jelinic voru næstir með fjögur mörk hver.
Dominik Kuzamanovic varði 13 skot í marki Króata, 42% á sama tíma og frönsku markverðirnir voru ekki sannfærandi.
