- Auglýsing -
- Franski línumaðurinn Cedric Sorhaindo hefur samið við Dinamo Búkarest til næstu tveggja ára. Eftir 11 ár hjá Barcelona kveður Sorhaindo, sem er 36 ára gamall, félagið í sumar. Hann er aðeins einn fjögurra leikmanna sem ekki eru af spænsku bergi brotinn sem hefur verið í herbúðum Katalóníuliðsins í áratug eða meira. Hinir eru Andrei Xepkin, Laszlo Nágy og Jesper Nøddesbo.
- Hollenski landsliðsmaðurinn Luc Steins hefur skrifað undir nýjan samning við franska stórliðið PSG sem gildir til ársins 2024. Steins kom til PSG í haust sem lánsmaður frá Tremblay og þykir hafa komið með nýja vídd inn í sóknarleik franska liðsins. Upphaflega stóð til að hann yrði aðeins hjá PSG út leiktíðina til að hlaupa í skarðið fyrir Nikola Karabatic sem sleit krossband í haust. Áður en Steins kom til sögunnar hjá PSG höfðu forráðamenn PSG m.a. litið hýru auga til Janusar Daða Smárasonar, landsliðsmanns og leikmanns Göppingen en ekki haft erindi sem erfiði.
- Adama Keita hefur framlengt samning sinn við PSG fram til ársins 2023.
- Danski landsliðsmarkvörðurinn Sandra Toft hefur skrifað undir nýjan samning við franska liðið Brest Bretagne sem gildir til ársins 2023. Toft, sem er 31 árs gömul, hefur verið í herbúðum Brest frá árinu 2019.
- Rússneski markvörðurinn Oleg Grams hefur kvatt herbúðir Dunkerque af persónulegum ástæðum. Samningur Grams við Dunkerque átti að renna út við lok leiktíðar.
- Rudolf Faluvégi samherji Viggós Kristjánssonar hjá Stuttgart sleit krossband í viðureign liðsins við Magdeburg á sunnudag. Hann er enn einn leikmaðurinn í þýska handboltanum sem slítur krossband á keppnistímabilinu.
- Auglýsing -
