Gísli Þorgeir Kristjánsson fékk þungt högg á hægri ristina um miðjan fyrri hálfleik í viðureign Íslands og Króatíu á Evrópumótinu í handknattleik í dag. Hann fór rakleitt eftir leikinn í myndatöku á sjúkrahúsi í Köln. Óttast menn það versta en vona um leið það besta.
Í tilkynningu frá HSÍ strax eftir leikinn er því heitið að greint verði frá niðurstöðum myndatökunnar um leið og hún liggur fyrir.
Íslenska landsliðið vann glæsilegan sigur í leiknum, 35:30.
Gísli Þorgeir kom ekkert meira við sögu eftir að hann fór af leikvelli um miðjan fyrri hálfleikinn. Hugsanlega meiðsli Gísla Þorgeirs bætast við veikindi Janusar Daða Smársonar og Ómars Inga Magnússonar. Þeir vöknuðu veikir í gærmorgun en veikindunum var haldið leyndum þangað til rétt áður en viðureignin við Króata kom í dag.
