„Það þurfti að grafa djúpt eftir þessari frammistöðu. Hún var frábær, kannski ekki frá byrjun en þegar okkur tókst að stilla strengina þá var ekki aftur snúið,“ sagði Björgvin Páll Gústavsson markvörður sem valinn var maður leiksins í dag þegar íslenska landsliðið vann Króatíu, 35:30, í milliriðlakeppni Evrópumótsins í handknattleik karla.
Björgvin Páll sagði að rauða spjaldið sem Ýmir Örn Gíslason fékk á tíundu mínútu hafi verið einn þáttturinn sem kveikti í mönnum.
„Það sást vel á viðbrögðum okkur. Við brutum okkur út úr skelinni og sýndum að það eru töffarar í liðinu. Menn héldu áfram, létu ekki hug falla þótt dauðafæri væru að fara forgörðum. Menn tóku bara næsta tækifæri, hengdu ekki haus,“ sagði Björgvin Páll ennfremur sem kom inn á völlinn eftir nærri 10 mínútna leik.
Helmingur þjóðarinnar gefist upp
„Ég fékk tvo þægileg skot á mig í upphafi sem kveiktu á mér. Mitt hlutverk á mótinu er að bakka upp Viktor Gísla. Mér hefur ekki alltaf ekkert tekist það. En ég er tilbúinn að þegar þörf á.
Fyrst og fremst er það sigur fyrir okkur á ná svona frammistöðu verandi í mótbyr, með tapleiki á bakinu. Sennilega var helmingur þjóðarinnar búinn að gefast upp á okkur farnir að kalla okkur íslenska landsliðið í staðinn fyrir strákana okkar,“ sagði Björgvin Páll Gústavsson markvörður.
Upptaka með lengra viðtali við Björgvin Pál er að finna hér fyrir neðan.
