Gísli Þorgeir Kristjánsson leikur ekki fleiri leiki með íslenska landsliðinu á Evrópumótinu í handknattleik karla í Þýskalandi. Hugsanlega verður hann frá keppni í einhverjar vikur vegna beinmars á rist.
Eins og áður hefur komið fram meiddist Gísli Þorgeir rétt fyrir miðjan fyrri hálfleik í viðureigninni við Króata í gær þegar hann fékk þungt högg á aðra ristina. Strax eftir leik var farið með Gísla í myndatöku á sjúkrahúsi í Köln. Þar kom í ljós beinmar í ristinni, ekki brot eins og óttast var jafnvel í fyrstu.
Gísli er með umbúðir á ristinni og styðst við hækjur. Hann verður þar með ekki aðeins lokið keppni með íslenska landsliðinu heldur er hætt við að hann verði frá keppni fyrst eftir að flautað verður til leiks í þýsku 1. deildinni í byrjun febrúar. Fyrsti leikur SC Magdeburg, sem Gísli leikur með, verður í bikarkeppninni við Rhein-Neckar Löwen 4. febrúar á heimavelli.
Hugsanlega verða fimm af 18 leikmönnum íslenska landsliðshópsins úr leik þegar kemur að leiknum við Austurríki á morgun. Auk Gísla Þorgeirs eru Janus Daði Smárason, Kristján Örn Kristjánsson, Donni, Óðinn Þór Ríkharðsson og Ómar Ingi Magnússon veikir, eins og handbolti.is hefur áður sagt frá.
Teitur Örn Einarsson leikmaður Flensburg bætist í hópinn í dag.
