Áfram berast slæmar fréttir úr herbúðum íslenska landsliðsins í handknattleik sem tekur þátt í Evrópumótinu í Þýskalandi. Nýjast er að Ýmir Örn Gíslason hefur verið úrskurðaður í eins leiks bann í framhaldi af rauðu spjaldi sem hann fékk eftir hálfa tíundu mínútu í leik Íslands og Króatíu í 3. umferð milliriðlakeppninnar í Lanxess Arena í Köln í gær.
HSÍ barst rétt áðan tilkynning um að Ýmir Örn hafi verið úrskurðaður í eins leiks bann sem tekur yfir næsta leik íslenska landsliðsins á mótinu gegn Austurríki í fjórðu og síðustu umferð milliriðlakeppninnar. Úrslit leiksins ráða því hvort íslenska eða austurríska landsliðið tryggir sér sæti í forkeppni Ólympíuleikanna.
Leikbann Ýmis Arnar bætist ofan á meðsli Gísla Þorgeirs Kristjánssonar sem ekki verður meira með á mótinu. Til viðbótar eru fjórir leikmenn veikir og óvissa ríkir um þátttöku þeirra í leiknum á morgun sökum veikindanna. Þeir eru Janus Daði Smárason, Kristján Örn Kristjánsson, Donni, Óðinn Þór Ríkharðsson og Ómar Ingi Magnússon.
Teitur Örn Einarsson kemur til móts við íslenska landsliðið í dag frá Flensburg. Snorri Steinn Guðjónsson sagði við handbolta.is í morgun, áður en fregnir af leikbanni Ýmis bárust, að hann reikni alveg eins með að kalla menn inn í landsliðshópinn í dag til viðbótar við Teit Örn. Ljóst að þeir geta ekki komið um langan veg.
Miðað við núverandi stöðu og við tilkomu Teitrs Arnar eru 13 leikmenn til reiðu fyrir leikinn við Austurríki á morgun.
Tengdar fréttir:
Beinmar í rist hjá Gísla Þorgeiri – EM úr sögunni
Tveir landsliðsmenn vöknuðu veikir í morgun
Teitur Örn kallaður til Kölnar
