Ísland hefur teflt fram 84 leikmönnum í 77 leikjum á EM

Alls hafa 84 handknattleiksmenn leikið fyrir íslenska karlalandsliðið í 77 leikjum á 13 Evrópumótum sem Ísland hefur haft rétt til þess að taka þátt í frá árinu 2000. Handknattleikssamband Evrópu, EHF, var sett á laggirnar 1991 og fyrsta Evrópumótið var haldið tveimur árum síðar og þar með féllu niður B- og C-heimsmeistaramót á vegum Alþjóða handknattleikssambandsins, IHF.

Íslenska landsliðinu tókst ekki að öðlast keppnisrétt á þremur fyrstu mótunum en hefur sleitulaust verið með frá árinu 2000. Á fyrstu mótunum tóku 12 landslið þátt og leikmannafjöldi í hverjum leik var bundinn við 14 og leikmannahópar takmarkaðir við 16.

Frá og með EM 2002 var þátttökuliðum fjölgað um fjögur, í 16 og í 24 frá og með EM 2020. Þegar á leið öldina var heimilað tefla fram 16 leikmönnum í hverjum leik og um tíma voru í gildi óljósar reglur um skiptingar leikmanna út og inn úr hópum. Íslenska landsliðið brenndi sig á reglunum á EM 2002 með þeim afleiðingum að ekki fékkst heimild til að tefla fram sextánda leikmanninum þegar til átti að taka.

Á allra síðustu árum mega 18 leikmenn vera í hverjum keppnishóp og má skáka þeim að vild inn og út á milli leikja en þó mega aldrei fleiri en 16 taka þátt í hverjum leik. Undantekning var gerð frá reglunni á EM 2022.

Tveir leikmenn bættust í hóp EM-nýliða að þessu sinni, Einar Þorsteinn Ólafsson og Stiven Tobar Valencia.

Flestir voru leikmenn íslenska hópsins, 26 á EM 2022 í Búdapest, þegar covid reið húsum, af þeim tóku 24 a.m.k. þátt í einum leik. Þar af voru 10 með á EM í fyrsta sinn. Fæstum leikmönnum tefldi Ísland fram á EM 2002, fimmtán. Af þeim lék einn alla leikina átta frá upphafi til enda, Einar Örn Jónsson.

Hér fyrir neðan eru listi yfir þá leikmenn sem leikið hafa fleiri en 16 landsleiki á EM fyrir Ísland, leikjafjöldi á EM, fjöldi móta og innan sviga ártal fyrsta móts og þess síðasta.