Björgvin Páll Gústavsson markvörður Vals og íslenska landsliðsins í handknattleik karla ætlar ekki að gefa kost á sér í vor þegar kosið verður til forseta Íslands. Björgvin Páll segir frá þessu í færslu á Facebook í dag. Hann útilokar ekki að sækjast eftir embættinu síðar á ævinni.
Í upphafi árs, eftir að Guðni Th. Jóhannesson forseti tilkynnti að hann ætlaði ekki að sækjast eftir endurkjöri í vor, gaf Björgvin Páll það í skyn að hann gæfi e.t.v. kost á sér.
„Ég á mér marga drauma, einn af þeim er einhverntímann að verða forseti Íslands. En ekki núna. Ég tel mig ekki nægilega lífsreyndan til þess að vera forseti. Eins eru allskonar aðrir draumar að flækjast fyrir mér sem ég þarf að uppfylla fyrst. Þeir draumar tengjast íþróttum, börnunum mínum og öllum hinum börnunum.
Það má leyfa sér að dreyma og eins og Vigdís Finnbogadóttir orðaði það við embættistökuna 1980 „Vér erum þelið sem draumar spinnast úr“,“ skrifar Björgvin Páll Gústavsson m.a. í ítarlegri færslu á Facebook í dag.
