Starri heldur áfram tryggð við uppeldisfélagið

Hornamaðurinn Starri Friðriksson hefur gert nýjan samning við handknattleiksdeild Stjörnunnar til ársins 2026. Starri hefur verið á meðal burðarása í Stjörnuliðinu á undanförnum árum. Hann var til að mynda markahæsti leikmaður liðsins á síðustu leiktíð, skoraði 82 mörk í 19 leikjum og er sá næst markahæsti á yfirstandandi tímabili með 64 mörk, einu færra en Hergeir Grímsson.

Starri er 29 ára og byrjaði snemma að æfa handknattleik með Stjörnunni og hefur haldið tryggð við félagið í gegnum súrt og sætt en slík tryggð er ekki algeng nú á tímum.

Starri lék með yngri landsliðunum á sínum tíma.