- Auglýsing -
Eyjamaðurinn Erlingur Birgir Richardsson er hættur þjálfun karlaliðs Sádi Arabíu eftir fáeina mánuði í starfi. Sigurður Bragason sagði frá þessu í lýsingu sinni frá viðureign ÍBV og Gróttu í Olísdeild karla sem stendur yfir í Vestmannaeyjum þessa stundina og er sendur út á handboltapassanum.
Sagt var frá ráðningu Erlings til Sádi Arabíu upp úr miðjum ágúst. Hann stýrði landsliðinu á þremur mótum, síðasta í Asíukeppninni í Barein í janúar. Sádar höfnuðu í 9. sæti og voru talsvert frá því að tryggja sér farseðlinn á heimsmeistaramótið að ári liðnu en um það var fyrst og fremst keppt.
Undir stjórn Erlings varð ÍBV Íslandsmeistari á síðasta vori. Hann hafði nokkru áður ákveðið að hætta þjálfun Eyjaliðsins í mótslok.
- Auglýsing -
