Selfoss heldur uppteknum hætti í Grill 66-deild kvenna og vinnur hvern leikinn á eftir öðrum. Í kvöld fagnaði liðið sínum fjórtánda sigri í deildinni þegar leikmenn Víkings voru sigraðir með 10 marka mun í Sethöllinni á Selfossi, 31:21. Ljóst virðist að fátt geti komið í veg fyrir að Selfossliðið fari rakleitt upp í Olísdeildina í vor og láti öðrum liðum eftir að taka þátt í umspili enda ekki á vísan róið í þeim efnum.
Víkingur er í þriðja sæti deildarinnar með 19 stig, þremur stigum á eftir Gróttu sem er í öðru sæti.
Eins og í fyrri leikjum sínum í deildinni, og reyndar í bikarnum einnig, þá tók lið Selfoss leikinn föstum tökum frá fyrstu mínútu. Víkingar reyndu hvað þeir gátu til þess að leggja stein í götu heimaliðsins en höfðu ekki erindi sem erfiði. Staðan var 17:11 að fyrri hálfleik loknum. Svipað var upp á teningnum í síðari hálfleik.
Cornelia Hermansson var öflug í marki Selfoss og varði 16 skot og var ein tíu leikmanna sem skoraði mark. Ída Bjarklind Magnúsdóttir var atkvæðamikil hjá Víkingi eins og stundum áður.
Staðan og næstu leikir í Grill 66-deildum.
Mörk Selfoss: Katla María Magnúsdóttir 6, Perla Ruth Albertsdóttir 6, Tinna Sigurrós Traustadóttir 6, Arna Kristín Einarsdóttir 4, Hulda Dís Þrastardóttir 3, Harpa Valey Gylfadóttir 2, Adela Eyrún Jóhannsdóttir 1, Cornelia Hermansson 1, Elínborg Katla Þorbjörnsdóttir 1, Katla Björg Ómarsdóttir 1.
Varin skot: Cornelia Hermansson 16.
Mörk Víkings: Ída Bjarklind Magnúsdóttir 7, Arna Þyrí Ólafsdóttir 3, Arnbjörg Bertha Kristjánsdóttir 2, Andrea Ósk Þorkelsdóttir 2, Díana Ágústsdóttir 2, Hafdís Shizuka Iura 2, Mattý Rós Birgisdóttir 1, Tinna Björk Bergsdóttir 1, Valgerður Elín Snorradóttir 1.
Varin skot: Signý Pála Pálsdóttir 9, Tara Sól Úranusdóttir 3.
