Línumaðurinn öflugi, Andri Finnsson, hefur framlengt samning sinn við Val um tvö ár. Þetta kemur fram í tilkynningu handknattleiksdeild Vals í dag.
Andri er uppalinn á Hlíðarenda þar sem hann hefur leikið með Val upp alla yngri flokka félagsins. Hann hefur einnig spilað með yngri landsliðum Íslands og var hann í U21 ár landsliði Íslands sem vann til bronsverðlauna á heimsmeistaramótinu á síðasta sumri.
Um tíma lék Andri sem lánsmaður hjá Gróttu við góðan orðstír.
„Þetta eru mikil gleðitíðindi fyrir Valsara því Andri hefur verið frábær á þessu tímabili og er mikilvægur leikmaður í meistaraflokksliði Vals sem er að berjast á öllum vígstöðum þessa stundina. Við væntum mikils af þessum efnilega línumanni og verður gaman að fylgjast með honum á næstu árum,“ segir í tilkynningu Valsara í dag.
