Hannes framlengir samningi til tveggja ára

Línumaðurinn Hannes Grimm hefur framlengt samning sinn við Gróttu til ársins 2026. Hannes hefur þrátt fyrir ungan aldur leikið með Gróttu til fjölda ára og á 148 leiki fyrir meistaraflokk félagsins og jafnan verið einn traustasti leikmaður liðsins, jafnt í vörn sem sókn.

Hannes hefur skorað 53 mörk í 16 leikjum Olísdeildar karla á yfirstandandi keppnistímabili.

„Það eru frábær tíðindi að Hannes verði áfram í herbúðum félagsins enda lykilleikmaður liðsins bæði sóknarlega og varnarlega. Þeir eru vandfundnir meiri Gróttumenn en Hannes Grimm. Hann hefur undanfarin sjö ár þjálfað yngri flokka félagsins við góðan orðstír,“ segir í tilkynningu handknattleiksdeildar Gróttu.