Grótta vann öruggan sigur á Víkingum í Olísdeild karla í handknattleik í kvöld þegar liðin mættust í Hertzhöllinni á Seltjarnarnesi, 32:24, eftir að hafa verið þremur mörkum yfir að loknum fyrri hálfleik.
Einar Baldvin Baldvinsson markvörður Gróttu fór á kostum gegn uppeldisfélaginu. Hann var frábær í kvöld og varði alls 16 skot, þar af eitt vítakast.
Með sigrinum fór Grótta upp að hlið Stjörnunnar með 13 stig í áttunda sæti. Stjarnan á leik til góða gegn Val á sunnudaginn. Víkingar halda áfram að troða marvaðann í 11. sæti, aðeins stigi á eftir HK sem sækir FH heim á morgun.
Gróttumenn voru með undirtökin í fyrri hálfleik í kvöld. Þeir tóku hinsvegar völdin í síðari hálfleik og hefðu þess vegna getað unnið stærri sigur en raun varð á.
Það var frábær mæting og stemning í Hertz-höllinni í kvöld en tæplega 600 áhorfendur fylktu liði og studdu liðið í þessum mikilvæga leik. Hannes Pétur Hauksson, 18 ára, lék sinn fyrsta leik fyrir meistaraflokk Gróttu. Hann leysti Einar Baldvin af í lokin og varði tvö skot, þar af eitt vítakast.
Staðan og næstu leikir í Olísdeildum.
Mörk Gróttu: Jakob Ingi Stefánsson 5, Ágúst Emil Grétarsson 4, Jón Ómar Gíslason 4/1, Ágúst Ingi Óskarsson 4, Ari Pétur Eiríksson 3, Lúðvík Thorberg Arnkelsson 3, Antoine Óskar Pantano 3, Elvar Otri Hjálmarsson 2, Einar Baldvin Baldvinsson 1, Gunnar Dan Hlynsson 1, Andri Fannar Elísson 1, Hannes Grimm 1.
Varin skot: Einar Baldvin Baldvinsson 16/1, 41% – Hannes Pétur Hauksson 2/1, 66,7%.
Mörk Víkings: Jóhann Reynir Gunnlaugsson 5/1, Þorfinnur Máni Björnsson 3, Halldór Ingi Óskarsson 3, Agnar Ingi Rúnarsson 3, Halldór Ingi Jónasson 2, Þorleifur Rafn Aðalsteinsson 2, Gunnar Valdimar Johnsen 2, Styrmir Sigurðarson 1, Stefán Scheving Guðmundsson 1, Sigurður Páll Matthíasson 1, Erlendur Guðmundsson 1.
Varin skot: Daníel Andri Valtýsson 10, 28,6% – Bjarki Garðarsson 2, 28,6%.
Tölfræði leiksins hjá HBStatz.
