„Það er virklega gaman að vera á ný í landsliðshópnum. Ég hef beðið spennt eftir þessu tækifæri,“ segir Elín Klara Þorkelsdóttir landsliðskona í samtali við handbolta sem mætt er í landsliðið á ný fyrir leikina við Svía í undankeppni Evrópumótsins. Fyrri leikurinn verður annað kvöld á Ásvöllum og hefst klukkan 19.30.
Elína Klara varð fyrir því óláni að meiðast nokkrum dögum áður en íslenska landsliðið fór út á heimsmeistaramótið í nóvember á síðasta á. Varð hún fyrir vikið að fylgjast með mótinu heiman frá sem skiljanlega voru mikið vonbrigði hjá Elínu sem valin var besti leikmaður Olísdeild kvenna á síðustu leiktíð.
Hefur alveg jafnað sig
„Tímasetningin var ömurleg en svona eru íþróttirnar og ég hef alveg jafnað mig af vonbrigðunum sem þessu fylgdi og er klár í slaginn með landsliðinu í leikina sem framundan eru,“ segir Elín Klara sem verður á heimavelli í kvöld þegar íslenska landsliðið mætir sænska landsliðinu í undankeppni Evrópumótsins. Flautað verður til leiks klukkan 19.30.
Bera okkur saman við þær bestu
„Markmið okkar er að gera okkar allra besta gegn sænska landsliðinu sem eitt það besta í heiminum. Þetta er eitt af fjórum bestu landsliðum heims. Þar af leiðandi verður bara gaman fyrir okkur að bera okkur saman við lið sem er í allra fremstu röð. Ég er mjög spennt fyrir þessum leik á heimavelli og einnig að fara út og reyna okkur gegn þeim þar á laugardaginn. Um leið verður þetta góður undirbúningur fyrir tvo síðustu leikina í riðlinum,“ sagði Elín Klara Þorkelsdóttir landsliðskona í handknattleik í samtali við handbolta.is.
Staðan í 7. riðli undankeppni EM:
Svíþjóð | 2 | 2 | 0 | 0 | 76:37 | 4 |
Ísland | 2 | 2 | 0 | 0 | 60:37 | 4 |
Færeyjar | 2 | 0 | 0 | 2 | 43:65 | 0 |
Lúxemborg | 2 | 0 | 0 | 2 | 31:71 | 0 |
- Síðari leikurinn við Svía fer fram í Karlskrona á laugardaginn og hefst klukkan 13.
- Tvær síðustu viðureignir riðlakeppninnar verða 3. og 7. apríl gegn Lúxemborg ytra og á við Færeyinga á Ásvöllum 7. apríl.
- Tvö efstu lið riðilsins verða örugg um sæti í lokakeppni EM sem fram fer í Austurríki, Ungverjalandi og Sviss í desember.