Darri Aronsson hefur framlengt samning sinn við handknattleiksdeild Hauka um þrjú ár. Darri mun því leika með meistaraflokki félagsins áfram næstu árin. Hann varð fyrir erfiðum meiðslum haustið 2019 og kom sterkur inn í Haukaliðið í byrjun árs.
Darri var einn af betri leikmönnum Hauka eftir að keppni hófst á ný í byrjun árs en lenti í því að meiðast á ný í leik í febrúar. Darri, sem verður 22 ára síðar á árinu, er þó við það að verða klár og má því búast við honum fljótlega á parketinu á ný, eftir því sem segir í tilkynningu frá Haukum.
Darri er einn af fjölmörgum uppöldum Haukastrákum sem framlengt hafa samninga sína undanfarin misseri og er það því ljóst að Haukaliðið verður áfram byggt upp á uppöldum Haukastrákum á komandi árum, segir ennfremur í tilkynningu félagsins
