Rakleitt farið á æfingu við komuna til Lúxemborgar

Íslenska landsliðið fór rakleitt á æfingu við komuna til Lúxemborgar upp úr miðjum degi í dag eftir prýðilegt ferðalag frá Íslandi. Flogið var til Brussel þaðan sem leiðin lá til Lúxemborgar með langferðabifreið. Allur farangur skilaði sér á áfangastað auk þeirra tveggja leikmanna sem komu ekki með hópnum frá Íslandi.

Framundan er viðureign við landslið Lúxemborgar á miðvikudaginn klukkan 16.45 í næst síðustu umferð 7. riðils undankeppni Evrópumótsins. Ef íslenska liðið vinnur leikinn tryggir það sér sæti í lokakeppni EM í fyrsta sinn í 12 ár. Lokakeppnin fer fram síðla ársins í Austurríki, Ungverjalandi og Sviss.

Æfingin í dag fór fram í æfingahúsnæði við hlið hótelsins. Ekki var verið að tvínóna. Leikmenn liðkuðu sig, hristu úr sér ferðastrengina og skrúfuðu aðeins upp púlsinn.

Á morgun verður æft í íþróttahöllinni þar sem leikið verður á miðvikudaginn. Að sögn Kjartans Vídó Ólafsson markaðsstjóra HSÍ sem er með í för er innan við hálftíma akstur frá hótelinu að keppnishöllinni. Hótel landsliðsins er nærri landamærum Lúxemborgar við Belgíu og Frakkland.

Úrslit leikja í 7. riðli undankeppni EM:
Ísland – Lúxemborg 32:14 (19:7).
Svíþjóð – Færeyjar 37:20 (19:13).
Færeyjar – Ísland 23:28 (12:11).
Lúxemborg – Svíþjóð 17:39 (7:15).
Lúxemborg – Færeyjar 16:34 (9:16).
Ísland – Svíþjóð 24:37 (12:17).
Svíþjóð – Ísland 37:23 (18:11).
Færeyjar – Lúxemborg 39:21 (17:9).

Staðan: