„Fyrstu leikirnir snúast bara um að ná í stigin tvö, ekkert annað,“ sagði Gunnar Magnússon, þjálfari Aftureldingar, eftir nauman sigur, 24:22, á Þór frá Akureyri á Varmá í kvöld fyrsta leik liðanna í Olísdeildinni á leiktíðinni. Sigurinn stóð tæpar en lokatölurnar gefa til kynna því tvö mörk Úlfars Monsa Þórðarsonar á síðustu sekúndum tryggðu stigin tvö.
„Eftir áfallið sem við urðum fyrir í gærkvöldi þegar Birkir Benediktsson sleit hásin þá vissi ég að við gætum lent í erfiðleikum. Við náðum ekki fimm mínútum til þess að bregðast við og æfa liðið með hægri handar manni á hægri kantinum í staðinn fyrir Birki. Enda var óttalegt basl á okkur í sóknarleiknum frá upphafi leiks til enda. Varnarleikurinn var hinsvegar framúrskarandi og það sem við tökum með okkur úr þessum leik,“ sagði Gunnar sem nú hefur viku fram að næsta leik til þess að laga sóknarleikinn að breyttum aðstæðum en ljóst þykir að Birkir verði frá keppni næsta hálfa árið.
„Þorsteinn Leó Gunnarsson, ungur strákur, kom inn með sterkan leik í síðari hálfleik. Hann tók af skarið og skoraði mikilvæg mörk. Ég er mjög ánægður með hans innlegg. Það var fyrst og síðast léttir að ná tveimur stigum úr þessum leik og skiptir öllu þegar upp er staðið,“ sagði Gunnar Magnússon.
Gunnar sagði ennfremur að hann væri enn að íhuga hvaða kostir gætu verið í stöðunni varðandi það skarð sem Birkir skilur eftir sig í Aftureldingarliðinu. Hann sagðist ekki útloka að sækja liðsstyrk.
