„Staðan á Þorsteini er óljós. Vonandi kemur hann til baka og getur hjálpað okkur eitthvað. Ég get bara ekki nákvæmlega svarað þessu því ég er ekki nægilega vel að mér í læknisfræðum,“ segir Gunnar Magnússon þjálfari karlaliðs Aftureldingar spurður hverjar horfurnar eru á að stórskyttan Þorsteinn Leó Gunnarsson leiki oftar með Aftureldingu á þessari leiktíð.
Þorsteinn Leó meiddist á hægri öxl fyrir rúmum mánuði og hefur ekkert leikið með félaginu sínu síðan auk þess sem hann varð að draga sig út úr landsliðshópnum sem fór til Grikklands í síðasta mánuði. Í sumar gengur Þorsteinn Leó til liðs við Porto í Portúgal.
„Það getur verið stutt í Þorstein en einnig getur svo farið að hann verði ekkert með okkur,“ segir Gunnar ennfremur eftir sigurleikinn gegn Stjörnunni í 1. umferð 8-liða úrslita Olísdeildar í gærkvöld, 29:28.
Nánar er rætt við Gunnar um meiðsli Þorsteins í myndskeiði efst í fréttinni.
