Ekkert varð af því að Grétar Ari Guðjónsson og samherjar í Nice mættu Sarraebourg í næst efstu deild franska handknattleiksins síðdegis í dag. Kórónuveiran leikur marga grátt í Frakklandi um þessar mundir og eftir því sem fram kemur á Fcebook-síðu Cavigal Nice Handball þá hefur veiran knúið dyra hjá liðinu. Af þeim sökum féll leikurinn niður.
Í gær kom upp úr dúrnum að veiran hefur búið um sig í herbúðum Nancy eins og handbolti.is greindi frá, en með Nancy leikur Elvar Ásgeirsson. Fleiri leikjum í tveimur efstu deildum franska handknattleiksins hefur verið frestað síðustu daga.
Svipaða sögu er að segja af keppni í þýsku 2. deildini. Fjórum af sex leikjum sem voru fyrirhugaðir í dag var frestað. Leikjum hefur verið slegið á frest vegna kórónuveirusmita sem virðist síst vera í rénun á þessum slóðum.
