„Því miður töpuðum við leiknum en frammistaðan var mikið betri en í fyrri leiknum og var nær því að sýna raunverulegan mun á liðunum,“ sagði Sigurgeir (Sissi) Jónsson þjálfari Stjörnunnar eftir fjögurra marka tap, 25:21, í síðari leiknum við Hauka í fyrstu umferð úrslitakeppninnar í Olísdeild kvenna í Hekluhöllinni í Garðabæ.
Stjarnan er þar með úr leik og Sissi hættur þjálfun liðsins en tilkynnt var fyrir nokkru að Patrekur Jóhannesson leysti hann af á næsta keppnistímabili.
„Við gerum upp þetta tímabil og getum verið ágætlega stolt af okkar frammstöðu. Auðvitað vildum við komast lengra í úrslitakeppninni. Hinsvegar komumst við í bikarúrslit og kannski stolið fleiri stigum í deildinni,“ sagði Sissi sem tók við erfiðu búi í sumar og var lengi að koma liðinu af stað. Hann segir það vera vonbrigði að fá ekki lengri tíma með liðinu en eitt ár.
„Um það þýðir ekki að tala. Svona er staðan. Nýr maður tekur liðið áfram eftir erfiðan vetur,“ sagði Sissi í samtali við handbolta.is.
Nánar er rætt við Sissa í myndskeiðinu hér fyrir ofan.