Kristrún Steinþórsdóttir hefur skrifað undir nýjan þriggja ára samning við handknattleikslið Fram. Hún hefur leikið með Fram frá 2019 þegar hún kom frá Selfossi. Kristrún er í dag einn af burðarstólpum liðsins sem hafnaði í öðru sæti í Olísdeildinni í vetur og mætir Haukum í undanúrslitum úrslitakeppninnar um Íslandsmeistaratitilinn. Fyrsta viðureign liðanna verður á þriðjudaginn í Lambhagahöllinni.
Í tilkynningu frá Fram segir að að Kristrún hafi reynst liðinu mikilvæg enda tekið þátt í öllum deildarleikjum liðsins í vetur sem miðjumaður og skytta, og skorað þar 36 mörk. Þá er hún jafnframt öflugur varnarmaður. Kristrún er reyndur leikmaður og góð fyrirmynd fyrir yngri leikmenn.
„Það er ánægjulegt að framlengja samning við Kristrúnu. Hún er mikilvægur hlekkur í öflugu liði Fram og við munum njóta góðs af því að hafa hana áfram í liðinu. Hún hefur spilað mikilvægt hlutverk í þeim árangri sem liðið hefur náð á tímabiliu,“ segir Einar Jónsson, þjálfari meistaraflokks kvenna í tilkynningu frá Fram.
Olís kvenna: Staðfestir leiktímar í undanúrslitum
