Umspil Olísdeildar kvenna hefst í kvöld í íþróttahúsinu að Varmá í Mosfellsbæ. Afturelding tekur á móti Gróttu. Flautað verður til leiks klukkan 19.30. Liðið sem fyrr vinnur þrjá leiki í umspilinu fær þátttökurétt í Olísdeild kvenna á næsta keppnistímabili.
Afturelding hafnaði í næst neðsta sæti Olísdeildar kvenna í vetur og komst þar með ekki hjá því að taka þátt í umspilinu. Í undanúrslitum lagði Afturelding lið FH, sem varð í fjórða sæti Grill 66-deildar, örugglega í tveimur viðureignum, 32:19 og 35:28.
Grótta hreppti annað sæti Grill 66-deildar kvenna í vetur og mætti Víkingi í undanúrslitum umspilsins rétt um fyrir miðjan þennan mánuði. Víkingur hlaut þriðja sæti Grill 66-deildar.
Skemmst er frá því að segja að Grótta vann Víking tvisvar sinnum í undanúrslitum, 28:21, í Hertzhöllinni á Seltjarnarnesi og 28:27 í hörkuleik í Safamýri 14. apríl.
Leikir umspilsins verða sendir út á Handboltapassanum.
Umspil Olísdeildar kvenna, 1. úrslitaleikur:
Varmá: Afturelding – Grótta, kl. 19.30.
- Næsti leikur liðanna verður á fimmtudaginn klukkan 16 í Hertzhöllinni á Seltjarnarnesi.
