Carlos Martin Santos tekur við þjálfun meistaraflokks karla hjá Selfossi af Þóri Ólafssyni. Handknattleiksdeild Selfoss staðfesti ráðninguna í tilkynningu í gærkvöld en áður hafði fréttin m.a. verið sögð í hlaðvarpsþætti á vegum félagsins fyrr í vikunni.
Carlos er ráðinn til þriggja ára. Hann hefur undanfarið ár verið aðstoðarþjálfari Þóris ásamt því að vera yfirþjálfari U-liðs og 3. flokks karla. Þar áður var Carlos þjálfari Harðar á Ísafirði um árabil.
Fram kemur í tilkynningu handknattleiksdeildar Selfoss að Carlos sé ætlað leiða uppbyggingu á næstu árum. Selfoss féll úr Olísdeildinni á dögunum eftir níu ára samfellda veru í deild þeirra bestu.
Selfoss vann Íslandsmeistaratitilinn vorið 2019 í fyrsta sinn í karlaflokki í meistaraflokki karla.
Lærdómsríkur tími
„Mér hefur liðið mjög vel hér á Selfossi þrátt fyrir nokkuð strembið tímabil. Ég hef lært mikið af því að vera aðstoðarþjálfari Þóris undandarið árið. Hér eru margir ungir og efnilegir leikmenn að koma upp, þannig að ég sé þetta sem mjög spennandi verkefni fyrir mig þar sem áherslan er á að þjálfa upp unga leikmenn,“ er haft eftir Carlos Martin Santos í tilkynningu.
