- Auglýsing -
Þriðji úrslitaleikur Vals og Hauka um Íslandsmeistaratitilinn í handknattleik kvenna fer fram í kvöld í N1-höll Vals á Hlíðarenda. Góð von ríkir um að flautað verði til leiks klukkan 19.40.
Haukar þurfa á sigri að halda til þess að halda lífi í rimmunni eftir tvo tapleiki. Valur verður Íslandsmeistari annað árið í röð með sigri í leiknum. Valur kreisti fram sigur, 28:27, í fyrstu viðureigninni en vann aftur á móti með miklum yfirburðum leiki liðanna á Ásvöllum á sunnudaginn, 30:22.
Ef að líkum lætur verður leikurinn í kvöld í opinni dagskrá í sjónvarpi Símans auk þess að vera aðgengilegur í handboltapassanum.