Innan við 200 miðar voru eftir til sölu á áttunda tímanum í kvöld á aðra viðureign Aftureldingar og FH í úrslitum um Íslandsmeistaratitilinn í handknattleik karla sem fram fer annað kvöld að Varmá. Stefnir í að síðustu miðarnir seljist í kvöld eða við aftureldingu á morgun.
Miðasalan er fram á Stubb.
Alls voru settir um 1.100 miðar í sölu en fleirum verður ekki hægt að koma fyrir í íþróttahúsinu að Varmá miðað við þá aðstöðu sem er þegar fyrir hendi auk þeirra sem sett verður upp eftir hádegið á morgun þegar Afturelding fær húsið afhent.
![](https://handbolti.is/wp-content/uploads/2024/05/60da7587-be40-4603-bc45-b821e7c29292-768x1024.jpg)
Stúka sótt til Þorlákshafnar
Afturelding hefur fengið stúku úr íþróttahúsinu í Þorlákshöfn. Leifur Guðjónsson hjá VHG, verktökum og vélaleigu í Mosfellsbæ, lætur sér ekki allt fyrir brjósti brenna. Hann fór austur við annan mann síðdegis í dag og kom stúkunni, sem er talsvert bákn, í flutningabíl.
Stúkan verður sett upp í íþróttasalnum að Varmá eftir hádegið á morgun. Með henni fjölgar ekki stæðum fyrir áhorfendur. Fyrst og fremst mun fara betur um þá, eftir því sem næst verður komist.
„Við erum að reyna gera eins góða umgjörð og við getum með það sem við höfum í höndunum,“ sagði Haukur Sörli Sigurvinsson formaður meistaraflokksráðs Aftureldingar við handbolta.is í kvöld.
Gríðarleg eftirvænting
Afturelding vann fyrsta leikinn í rimmunni við FH um Íslandsmeistaratitilinn, 32:29. Þar af leiðandi ríkir gríðarleg eftirvænting meðal Mosfellinga fyrir næstu leikjum í einvíginu. FH-ingar eru einnig afar áhugasamir eftir mjög gott tímabil en þeir fengu nærri 2.000 áhorfendur í Kaplakrika á fyrsta leikinn á sunnudagskvöld.