Landsliðsmennirnir Arnar Freyr Arnarsson og Elvar Örn Jónsson leika ekki með MT Melsungen í tveimur síðustu leikjum liðsins í þýsku 1. deildinni í handknattleik. Þetta kemur fram í tilkynningu félagsins í dag.
Elvar Örn er tognaður á nára og hefur átt í þeim meiðslum um nokkurt skeið. Þau gerðu að verkum að Elvar Örn gat ekki tekið þátt í leikjunum við Eistland í fyrri hluta þessa mánaðar. Meiðslin er ein afleiðing gríðarlegs álags eftir að hafa leikið 55 til 60 mínútur í nær öllum leikjum tímabilsins. Nú er svo komið að vænlegast er að láta gott heita og ná heilsu á nýja leik.
Arnar Freyr var með landsliðinu í báðum viðureignum við Eistland 8. og 11. maí. Vegna veikinda var hann ekki með Melsungen á heimavelli á síðasta föstudag gegn Wetzlar. Nú liggur fyrir að vegna veikindanna nær hann ekki heldur tveimur síðustu leikjum Melsungen gegn Göppingen eftir viku og þegar THW Kiel sækir Melsungen heim í lokaumferðinni sunnudaginn 2. júní.
Melsungen situr í 5. sæti þýsku 1. deildarinnar með 41 stig eftir 32 af 34 leikjum tímabilsins og á góða von um að tryggja sér sæti í Evrópukeppni félagsliða á næsta keppnistímabili.