Gríðarlegur áhugi er fyrir þriðja úrslitaleik FH og Aftureldingar í úrslitum Íslandsmóts karla í handknattleik sem fram fer í Kaplakrika í Hafnarfirði á sunnudaginn. Fastlega má búast við að uppselt verði á viðureignina en svogott sem uppselt var á fyrsta leikinn sem fram fór á síðasta sunnudag í Krikanum.
Miðasala hófst klukkan 12 í dag á Stubb.is á þriðja leikinn sem hefst klukkan 19.40 á sunnudagskvöld. Miðaverð er 1.500 kr fyrir börn og 3.000 kr fyrir fullorðna.
Staðan í einvíginu er jöfn, hvort lið hefur unnið einn leik en þrjá sigra þarf til þess að verða Íslandsmeistari.
Nærri 2.000 áhorfendur fjölmenntu á fyrsta leikinn og 1.400 áhorfendur troðfylltu íþróttahúsið að Varmá í gærkvöld þegar FH jafnaði metin með eins marks sigri, 28:27.
Myndasyrpa: Afturelding – FH, 27:28
Olís karla: Leikjadagskrá, úrslitakeppni
