Felix Már Kjartansson hefur snúið í heimahagana á handknattleikssviðinu og samið við HK. Felix Már, sem er 21 árs gamall, hefur síðustu tvö ár verið í herbúðum Fram og lék með ungmennaliðinu í Grill 66-deildinni og kom einnig við sögu í Olísdeildarliði félagsins.
Þegar Felix Már yfirgaf HK fyrir þremur árum flutti hann til Færeyja og lék með Neistanum í eitt tímabil í úrvalsdeildinni. Var hann í talsverðu hlutverki hjá liðinu ásamt Ágústi Inga Óskarssyni. M.a. lék Neistinn til úrslita í bikarkeppninni.
„Það er alltaf fagnaðarefni þegar HK-ingar snúa heim og hlökkum við til að vinna með honum. Þetta er topp drengur í alla staði, ljúfur í samskiptum og frábær karakter,“ segir m.a. í tilkynningu HK vegna komu Felix Más.
HK hélt sæti sínu í Olísdeildinni í vor. Mæta leikmenn reynslunni ríkari til leiks í haust undir stjórn nýs þjálfara, Halldórs Jóhanns Sigfússonar.
