Orri Freyr Þorkelsson, vinstri hornamaður Hauka, hefur skrifað undir tveggja ára samning við norska meistaraliðið Elverum og gengur til liðs við félagið í sumar. Frá þessu greinir Elverum nú í morgunsárið.
Ny signering ✍️
— ElverumHandball (@ElverumHandball) May 6, 2021
Velkommen til Elverum Orri Freyr Þorkelsson🤩 I desember debuterte han for🇮🇸 og neste sesong skal han skåre mål for🖤🤍#sammenforelverum #klubbforlivet #ehfcl pic.twitter.com/GWE8GjGzQe
Orra Frey er ætlað að fylla skarð Alexander Blonz sem á dögunum samdi við Pick Szeged í Ungverjalandi.
Orri Freyr, sem er 21 árs gamall, er markahæsti leikmaður Hauka, efsta liðs Olísdeildar karla, með 92 mörk í 15 leikjum sem gerir 6,1 mark að jafnaði í leik. Hann er með 80% skotnýtingu.
Orri Freyr lék sinn fyrsta A-landsleik í byrjun nóvember gegn Litáum í Laugardalshöllinni í undankeppni EM. Þar að auki á hann leiki með yngri landsliðum Íslands.
Elverum hefur um árabil verið sterkasta handknattleikslið í karlaflokki í Noregi og leikið síðustu ár í Meistaradeild Evrópu. M.a. hefur Elverum orðið norskur meistari fjórum sinnum á síðustu fimm árum. Sigvaldi Björn Guðjónsson, landsliðsmaður í handknattleik og nú leikmaður Vive Kielce, lék með Elverum frá 2018 til 2020. Þráinn Orri Jónsson, samherji Orra Freys hjá Haukum, lék með Elverum frá 2017 til 2019.
Fleiri Íslendingar hafa leikið með liðinu fyrr á árum og má m.a. nefna Hannes Jón Jónsson og Ingmund Ingimundarson auk Axels Stefánsson sem þjálfaði karlaliðið um árabil á síðari hluta fyrsta áratugar aldarinnar.
