Oddaleikur fer fram um gríska meistaratitilinn í handknattleik karla á sunnudaginn eftir að AEK Aþena jafnaði metin í rimmunni með sigri í fjórða úrslitaleiknum við Olympiakos, 28:23, á heimavelli í dag. Hvort lið hefur þar með tvo vinninga.
Ljóst er að farið er á svig við tilmæli Handknattleikssambands Evrópu, EHF, um að deildarkeppni skuli vera lokið fyrir úrslitahelgi Meistaradeildar Evrópu sem fram fór um síðustu helgi.
Úrslitaleikurinn á sunnudaginn fer fram á heimavelli Olympiakos, Ilioupoli, og hefst klukkan 16.30 að íslenskum tíma. Fyrir áhugasama má nefna að leiknum verður streymt á youtube.
Olympiakos byrjaði leikinn af krafti og var fjórum mörkum yfir, 9:5, um miðjan hálfleikinn.
Vopnin snerust í höndum leikmanna Olympiakos. Liðsmenn AEK sneru vörn í sókn og voru með jafna stöðu eftir 30 mínútur, 15:15. Heimaliðið var talsvert sterkara í síðari hálfleik, ekki síst tókst leikmönnum AEK afar vel upp við að verjast.
Upptaka frá leiknum í dag:
