Rakel Dögg Bragadóttir verður næsti þjálfari kvennaliðs Fram í handknattleik. Henni til aðstoðar verður Arnar Pétursson landsliðsþjálfari kvenna í handknattleik. Þetta hefur RÚV samkvæmt heimildum og að þau skrifi jafnvel undir samninga síðar í dag. Það gæti nú rekist á ársþing HSÍ sem nú stendur yfir í Laugardalshöll en ekki er útilokað að einhverjir stjórnendur Fram taki þátt í þinginu.
Þrálátur orðrómur hefur verið uppi síðustu vikur um að Arnar komi til starfa hjá Fram. Samkvæmt heimildum handbolta.is mun stjórn handknattleiksdeildar félagsins hafa óskað eftir fyrir nokkrum vikum að HSÍ gæfi Arnari leyfi til þess að þjálfa hjá Fram samhliða því að vera þjálfari kvennalandsliðsins. Ef heimildir RÚV eru réttar um að samningur liggi klár og nánast klappaður á borðinu í Lambhagahöllinni þá virðist stjórn HSÍ hafa gefið eftir.
Rakel Dögg hefur tvö síðustu ár verið annar þjálfari kvennaliðs Fram. Fyrst með Stefáni Arnarsyni og síðan með Einari Jónssyni í vetur sem leið. Einar sagði starfi sínu lausu í vor.
Rakel Dögg er reyndur þjálfari sem var oftar en einu sinni aðalþjálfari kvennaliðs Stjörnunnar með góðum árangri. Auk þess var hún ein fremsta handknattleikskona landsins um árabil og atvinnukona í íþróttinni í Noregi og í Danmörku auk sigursæls ferils með Stjörnunni sem leikmaður. Hún hefur leikið ríflega 100 landsleiki.
Önnur konan
RÚV rifjar upp að verði Rakel Dögg ráðinn aðalþjálfari Fram mun hún verða önnur konan til þess að vera aðalþjálfari kvennaliðs félagsins. Guðríður Guðjónsdóttir var þjálfari 1986 – 1988 og svo aftur 1992 – 1997.
Rakel Dögg og Arnar verða þjálfarar U18 ára landsliðs kvenna sem keppir á HM í Kína frá 14. til 25. ágúst í sumar.
