„Við notum daginn til þess að búa okkur sem best undir stórleikinn á morgun, gegn Svartfjallalandi. Við æfðum í morgun og áttum síðan góðan dag saman áður en fundur var seinni partinn,“ sagði Ágúst Þór Jóhannsson annar þjálfara U20 ára landsliðs kvenna sem mætir Svartfjallalandi í fyrri viðureigninni í milliriðli í 16-liða úrslitum heimsmeistaramótsins í handknattleik á morgun. Sigur tryggir íslenska liðinu sæti í átta liða úrslitum.
Ísland hefur keppni í milliriðli með tvö stig eins og Portúgal. Svartfellingar og Norður Makedónía eru án stiga.
„Við höfum kynnt okkur leik Svartfellinga og það er ljóst að liðið er feikilega öflugt en okkar markmið er að gera allt til þess að veita þeim harða mótspyrnu og ná í tvo punkta. Við hlökkum til framhaldsins,“ sagði Ágúst Þór og bætti við að afar góður andi væri í íslenska hópnum eftir þrjá sigurleiki.
HMU20 kvenna: Milliriðlar, leikir, úrslit og staðan
Um miðjan daginn var dagskráin brotin upp og leikmenn hittu fjölskyldur sínar sem eru í Skopje og hafa myndað harðsnúna stuðningssveit. Hér fyrir neðan eru nokkrar myndir frá deginum.
Leikur Íslands og Svartfjallalands hefst klukkan 16 á morgun, mánudag. Handbolti.is verður að vanda með textalýsingu auk þess boðið verður upp á streymi frá leiknum.
