U16 ára landslið kvenna hóf keppni af krafti á Opna Evrópumótinu í Gautaborg í handknattleik í dag og lék tvo leiki. Annan í morgun og hinn um miðjan dag. Vel gekk í báðum leikjum. Í fyrri leiknum gerði íslenska liðið jafntefli við Króatíu, 17:17, en síðari leikurinn, gegn Litáen, vannst, 19:18. Á morgun leikur liðið við Færeyjar kl. 13.00 og Noreg kl.18.00.
Leikurinn við Króata var æsispennandi en íslenska liðið byrjaði betur og var yfir allan fyrri hálfleik. Í þeim síðari náði Króatía fljótlega forystu en með frábærum endaspretti náði íslenska liðið að jafna og hefði getað tryggt sér sigur á loka sekúndum leiksins en síðasta markskotið hafnaði á stönginni.
Mörkin skoruðu: Roksana Jaros 4, Agnes Lilja Styrmisdóttir 4, Silja Katrín Gunnarsdóttir 3, Eva Steinsen Jónsdóttir 2, Ebba Guðríður Ægisdóttir 1, Tinna Ósk Gunnarsdóttir 1, Vigdís Arna Hjartardóttir 1 og Hrafnhildur Markúsdóttir 1.
Í markinu varði Arna Sif Jónsdóttir 8 skot.
Náðu mest sjö marka forskoti
Í leiknum við Litáen var íslenska liðið mun öflugra í fyrri hálfleik og náði öruggri forystu og var fimm mörkum yfir í hálfleik, 11:6. Í síðari hálfleik hélt liðið uppteknum hætti framan af og náði mest sjö marka forskoti. Þá slaknaði á liðinu og litáísku stelpurnar gengu á lagið og voru nálægt því að jafna metin áður en lokaflautan gall.
Mörkin skoruðu: Ebba Guðríður Ægisdóttir 7, Agnes Lilja Styrmisdóttir 3, Eva Steinsen Jónsdóttir 3, Dagný Þorgilsdóttir 2, Vigdís Arna Hjartardóttir 2, Silja Katrín Gunnarsdóttir 1 og Hrafnhildur Markúsdóttir 1.
Í markinu varði Danijela Sara B. Björnsdóttir 9 skot.
Sextán ára landsliðið hefur keppni á Opna Evrópumótinu
