„Það er bara mjög spennandi að vera komnir í átta liða úrslit,“ sagði Breki Hrafn Árnason annar markvörður U20 ára landsliðs Íslands í handknattleik þegar handbolti.is hitti hann eftir æfingu landsliðsins í Lasko í dag, þegar stund var á milli stríða á Evrópumótinu í Slóveníu. Riðlakeppninni lauk í gærkvöld og á morgun hefjast átta liða úrslit með keppni í tveimur fjögurra liða riðlum. Íslenska landslið er í öðrum þeirra og hefur leik gegn Portúgal klukkan 14.20.
„Svíaleikurinn var alls ekki nógu góður af okkar hálfu. Við þurfum þar með að svara fyrir þá viðureign á morgun gegn Portúgal. Við erum allir staðráðnir í að mæta grimmir til leiks og leika af fagmennsku,“ sagði Breki Hrafn ákveðinn.
Portúgalska liðið hefur á að skipa góðum skyttum og hornamönnum auk markvarðanna. Margir leikmenn eru á samningi hjá félagsliðum í efstu deild í Portúgal. „Leikurinn verður áskorun fyrir okkur en við erum tilbúnir í slaginn,“ sagði Breki Hrafn og bætti við að vonbrigðin með Svíaleikinn hafi verið skilin eftir í Tri Lilije fljótlega eftir að flautað var til leiksloka.
Íslenska landsliðið er ekki aðeins komið í hóp átta efstu á EM heldur hefur það tryggt 21 árs landsliði næsta árs þátttökurétt á HM í Póllandi að ári liðnu.
Talsvert myndskeiðsviðtal er við Breka Hrafn efst í fréttinni.
Leikir Íslands í milliriðlakeppni átta liða úrslita:
Portúgal - Ísland, 15. júlí kl. 12.20
Ísland - Austurríki, 16. júlí, kl. 10.
Spánn - Ísland, 18. júlí, kl. 12.20.
- Allir leiktímar eru miðaðir við tímann á Íslandi.
Viðureign Íslands og Portúgals hefst klukkan 12.20 á morgun. Handbolti.is er í Slóveníu og mun fylgja landsliðinu eftir mótið á enda. Beint textalýsingu verður úr Zlatorog Arena í Celje auk þess sem viðtöl verða við leikmenn og þjálfara
EMU20 karla: Leikir, úrslit og staðan, riðlakeppni
