Handknattleiksþjálfarinn Kristinn Guðmundsson hefur framlengt samning sinn við Eiðis Bóltfelag í Færeyjum. Nýi samningurinn er til tveggja ára. Um leið tekur Kristinn við sem yfirþjálfari hjá handknattleiksdeild félagsins.
Kristinn flutti til Færeyja fyrir þremur árum til þess að sinna þjálfun hjá Eiðis Bóltfelag en kvennalið félagsins, sem er ungt að árum, leikur í úrvalsdeildinni. Vegna aukinna verkefna sem yfirþjálfari félagsins hefur Geir Wardum verið ráðinn með Kristni sem þjálfari kvennaliðs Eiðis Bóltfelag, eftir því sem fram kemur í tilkynningu félagsins.
Um skeið var Kristinn einnig þjálfari yngri landsliða kvenna í Færeyjum.
Kristinn var síðast þjálfari karlaliðs ÍBV hér heima áður en hann flutti til Færeyja. Einnig var hann um árabil þjálfari hjá HK áður en hann flutti til Noregs og var m.a. þjálfari í Førde og Volda.
