Svo kann að fara að hinn nýbakaði leikmaður Gróttu, Hafsteinn Óli Berg Ramos Rocha leiki með landsliði Grænhöfðaeyja á heimsmeistarmótinu sem fram fer í janúar á næsta ári. Fjölmiðillinn Criolosports á Grænhöfðaeyjum sagði frá á mánudaginn að Hafsteinn Óli, sem á föður frá Grænhöfðaeyjum, hafi rætt við forráðamenn handknattleikssambands landsins um möguleika þess að leika fyrir landslið eyjanna.
Grænhöfðeyingar eru í G-riðli með landsliðum Íslands, Kúbu og Slóveníu á heimsmeistaramótinu sem fer fram í Zagreb í janúar.
Hafsteinn Óli er Fjölnismaður að upplagi og lék með sigursælum yngri flokkum félagsins sem varð m.a. Íslands- og bikarmeistari í 3. flokki. Hann hefur undanfarin þrjú ár leikið með HK eftir eins árs veru hjá Aftureldingu 2020/2021. Reyndar er því haldið fram í Criolosports og sá misskilningur skolað upp á fjörur hér á landi að Hafsteinn Óli sé leikmaður Aftureldingar. Hann hefur ekki leikið fyrir Aftureldingu í þrjú ár.
Hafsteinn Óli yfirgaf HK 16. júlí og skrifaði undir þriggja ára samning við Gróttu, eins og handbolti.is sagði frá.
