Auður Ester Gestsdóttir hægri hornamaður Íslands- og bikarmeistara Vals leikur ekkert með Val á næsta keppnistímbili. Hún er ólétt og tekur sér þar af leiðandi hlé frá handknattleik. Þetta staðfesti Ágúst Þór Jóhannsson þjálfari Vals í spjalli yfir molakaffi við Handbolti.is í morgun.
Ágúst Þór er kominn á fullt ásamt leikmönnum við undirbúning fyrir næsta keppnistímabil. Ekki veitir af því tíminn líður hratt og aðeins nærri sex vikur þangað til flautað verður til leiks í Olísdeild kvenna. Til stendur að Valur mæti ÍR í fyrstu umferð deildarinnar á heimavelli 7. september.
Áður en deildin hefst verður væntanlega búið að koma á dagskrá viðureign Vals og Stjörnunnar í Meistarakeppni HSÍ sem ævinlega fer fram fyrir upphafsumferð deildarinnar ár hvert.
Valur átti frábært keppnistímabil á síðasta vetri og vann 30 af 31 leik sínum í Olísdeildinni, úrslitakeppninni og í Poweradebikarnum.
