Bæjarráð Vestmannaeyja hefur samþykkt reglur til að koma til móts við efnilegt íþróttafólk bæjarsins sem er í sumarvinnu hjá bænum en þarf á sama tíma að sinna verkefnum á vegum yngri landsliða, hvort heldur í hóp- eða einstaklingsíþróttum.
Einnig verður með reglunum hlaupið undir bagga með A-landsliðsfólki sem vinnur hjá bænum en er valið til þátttöku með landsliðum Íslands. Frá þessu segir Íris Róbertsdóttir bæjarstjóri Vestmannaeyjarbæjar í færslu á Facebook. Reglurnar eru afturvirkar til 1. maí á þessu ári.
Ungt landsliðsfólk heldur launum sé það í sumarvinnu hjá Vestmannaeyjabæ þegar það fer í landsliðsverkefni. Einnig verður A-landsliðsfólki skv. reglunum mætt með launastyrk vegna fjarveru frá vinnu vegna landsliðsverkefna, sé það starfsfólk sveitarfélagsins.
Þá geta iðkendur sótt um sérstakan ferðastyrk, greiði sérsamband ekki ferðakostnað þeirra við landsliðsferðir erlendis.
„Bæjarráð Vestmannaeyja skorar á ríkið og ráðherra málaflokksins að styðja betur við afreksstarf á Íslandi og sameiginleg landslið okkar. Ekki veitir af eins og fram hefur komið undanfarið,“ segir m.a. í færslu Írisar.
Nokkur ungmenni frá Vestmannaeyjum eiga sæti í yngri landsliðunum í handknattleik, sem hafa tekið þátt eða eiga eftir að taka þátt, í Evrópu- og heimsmeistaramótum í sumar.
