Norska handknattleikskonan Susanne Denise Pettersen hefur skrifað undir tveggja ára samning við kvennalið KA/Þórs sem mun leika í Grill 66-deildinni á næsta keppnistímabili. Susanne sem er 27 ára gömul vinstri skytta kemur til liðs við KA/Þór frá norska liðinu Pors sem leikið hefur í neðri deildum norska handknattleiksins.
Í tilkynning frá KA/Þór segir að Susanne hafi gert það gott með liði Pors undanfarinn áratug jafnt í 1. og 2. deild með liðinu og var meðal annars næstmarkahæst í 2. deildinni á síðustu leiktíð.
„Það verður afar spennandi að fá þessa öflugu og reynslumiklu skyttu í lið okkar en á komandi vetri er lagt upp með að byggja upp öflugan kjarna af ungum og uppöldum leikmönnum og er það afar sterkt að fá inn sterkan utanaðkomandi leikmann til að miðla af sinni reynslu,“ segir orðrétt í tilkynningu KA/Þórs í dag.
Konur – helstu félagaskipti 2024
