Aðeins eru rétt rúmar þrjár vikur þangað til keppni hefst í Olísdeild kvenna í handknattleik og undirbúningur liðanna hafinn fyrir nokkru af miklum krafti. Íslandsmeistarar Vals fara til Purto De La Cruz á Tenerife í dag í vikulangar æfingabúðir. Afturelding, sem leikur í Grill 66-deild kvenna, verður einnig í sömu ferð og ætlar að safna þreki á sama stað og Íslandsmeistararnir.
„Við ætlum að æfa af miklum krafti ytra auk þess að leika tvo æfingaleiki,“ sagði Ágúst Þór Jóhannsson þjálfari Íslands- og bikarmeistara Vals í samtali við handbolta.is í gær.
Eftir viku stefna kvennalið ÍR og Gróttu, sem einnig leika í Olísdeild kvenna, út til Purto De La Cruz til vikudvalar. Einnig stendur til að karlalið Fram dvelji við æfingar á eyjunni fögru.
Ágúst sagði mikinn hug vera í leikmönnum Íslandsmeistara Vals. Liðið lék tvo æfingaleiki í vikunni. Þann fyrri við ÍR á mánudaginn og hinn síðari í gær gegn Gróttu. Báðar viðureignir unnust með talsverðum mun.
Ekki hefur verið tilkynnt hvenær Valur og Stjarnan mætast í Meistarakeppni kvenna en leikurinn í Meistarakeppni HSÍ slær ævinlega upphafstóninn að Íslandsmótinu ár hvert.
