Tvö handknattleikslið frá Vestmannaeyjum taka þátt í Íslandsmóti karla á komandi keppnistímabili eftir að Handknattleiksbandalag Heimaeyjar (HBH) var komið á koppinn um leið og það tilkynnti um þátttöku í Grill 66-deild karla sem hefst keppni í 21. september.
HBH verður venslalið ÍBV og hefur það m.a. að markmiði að halda betur utan um yngri leikmenn sem ekki hafa enn náð fótfestu í meistaraflokksliði ÍBV og tryggja þeim betri umgjörð en áður hefur verið og koma um leið til móts við ríkan áhuga fyrir handbolta í Vestmannaeyjabæ. HBH leysir að hluta af hólmi ÍBV 2 sem lék í 2. deild á síðasta tímabili.
„Undanfarin ár hefur ÍBV handboltafélag haldið úti U-liði (ungmennaliði). U-liðs leikmenn okkar hafa fram að þessu verið okkar framtíðarleikmenn. Verið landsliðsmenn yngri landsliða og verið að stefna á eða stíga sín fyrstu skref inn í meistaraflokk,“ segir m.a. í tilkynningu á Facebook-síðu ÍBV handbolta.
„HBH mun vera í Grill-66 deildinni í vetur og etja þar kappi við lið í hærri styrkleikaflokki og þar af leiðandi undirbúa okkar leikmenn betur sem framtíðar leikmenn ÍBV,“ segir ennfremur í áðurnefndri tilkynningu sem sjá má í heild sinni hér fyrir neðan.
