- Auglýsing -
- Axel Hreinn Hilmisson sem verið hefur markvörður handknattleiksliðs FH undanfarin tvö ár verður ekki með liðinu í vetur og er hugsanlega hættur í handknattleik. Alltént verður Axel Hreinn ekki með FH á keppnistímabilinu sem fer í hönd. Hinn þrautreyndi markvörður, Birkir Fannar Bragason, hefur æft af krafti og verður markvörður FH-inga á komandi leiktíð ásamt Daníel Frey Andréssyni sem gekk til liðs við FH fyrir ári.
- Handknattleiksdómarinn Ómar Ingi Sverrisson er mættur til leiks í fámennan en traustan hóp dómara hér á landi eftir um 10 ára veru í Noregi. Ytra fékkst Ómar Ingi m.a. við dómgæslu á kappleikjum.
- Ómar Ingi dæmdi úrslitaleik Hafnarfjarðarmótsins í gær á milli Hauka og FH ásamt Þorleifi Árna Björnssyni. Tókst þeim félögum vel upp. Reyndar veltu ýmsir fyrir sér hver væri að dæma með Þorleifi Árna. Einum sem fylgdist með leiknum datt í hug að þarna væri e.t.v. á ferðinni erlendur gestadómari. Sú reyndist aldeilis ekki vera raunin.
- Aron Rafn Eðvarðsson markvörður Hauka gekkst undir aðgerð vegna kviðslits fyrir 12 vikum. Hann er kominn á ról á nýja leik og og lék með Haukum í um stundarfjórðung í úrslitaleiknum við FH Hafnarfjarðarmótinu á Ásvöllum í gær.
- Ólafur Ægir Ólafsson lék ekki lengi með Haukum í úrslitaleiknum við FH. Hann er að ná sér á strik eftir að hafa glímt við meiðsli.
- Pólskur fyrrverandi unglingalandsliðsmaður æfði með FH í nokkra daga snemma á undirbúningstímabilinu í sumar. Hann býr hér á landi um þessar mundir og starfar sem verkamaður suður með sjó. Ekkert varð hinsvegar meira úr æfingum Pólverjans sem þrátt fyrir örfáar æfinga vakti nokkra athygli og fóru sögur af veru hans hjá Íslandsmeisturunum sem eldur í sinu um handboltaveröldina hér á landi.
- Leonharð Þorgeir Harðarson lék ekkert með FH í leikjum Hafnarfjarðarmótsins vegna meiðsla í hné. Einnig var Birgir Már Birgisson ekkert með þótt hann væri klæddur í búning á varamannabekknum. Hann hefur einnig átt í meiðslum. Ágúst Birgisson var heldur ekki með FH-ingum í viðureigninni við Hauka á Hafnarfjarðarmótinu í gær.
- Íslandsmeistarar FH og bikarmeistarar Vals mætast í meistarakeppni HSÍ í karlaflokki á heimavelli Íslandsmeistaranna í Kaplakrika á miðvikudagskvöld. Flautað verður til leiks klukkan 19.30.
Leikjadagskrá Olísdeilda
- Auglýsing -
