Leikur um bronsið

Óðinn Þór Ríkharðsson leikur um bronsverðlaun í dönsku úrvalsdeildinni í handknattleik með samherjum sínum í Holstebro eftir tap fyrir Bjerringbro/Silkeborg í síðari undanúrslitaleiknum í dag, 30:25.

Holstebro mætir annað hvort GOG eða Aalborg í viðureign um þriðja sætið. Tvö síðarnefndu liðin eigast við öðru sinni þessa stundina í Álaborg.

Holstebro var marki yfir í hálfleik í Silkeborg í dag, 13:12. Eftir miðjan síðari hálfleik náðu leikmenn Bjerringbro/Silkeborg góðum tökum á leiknum sem þeir létu ekki af hendi.

Óðinn Þór átti prýðilegan leik. Hann skoraði fjögur mörk í fimm skotum og átti eina stoðsendingu og fékk næst flest framlagsstig leikmanna liðsins.