Handknattleiksdómararnir Árni Snær Magnússon og Þorvar Bjarmi Harðarson dæma í fyrsta sinn í Evrópukeppni félagsliða í handknattleik síðar í þessum mánuði. Má segja að þeir félagar fái tvo fyrir einn í frumraun sinnni í Evrópukeppni í Nea Kios í Grikklandi 20. og 21. þessa mánaðar.
Árna Snæ og Þorvari Bjarma hefur verið falið að dæma leiki gríska liðsins Diomidis Argous og Black Devils Meran frá Ítalíu í Evrópubikarkeppni karla. Báðir leikir fara fram í Nea Kios á Grikklandi. Samanlagður sigurvegari kemst í aðra umferð keppninnar.
Árni Snær og Þorvar Bjarmi luku við að tryggja sér EHF-réttindi sem dómarar í vor og voru formlega útskrifaðir í síðasta mánuði. Þeir eru eitt þriggja íslenskra dómarapara með gild EHF-réttindi um þessar mundir. Hin tvö pörin eru Anton Gylfi Pálsson og Jónas Elíasson annars vegar og Svavar Ólafur Pétursson og Sigurður Hjörtur Þrastarson hinsvegar.
Sigurður og Svavar til Noregs
Svavar og Sigurður verða á faraldsfæti með flautur, spjöld, skó og búninga sína undir lok vikunnar þegar þeir fara til Noregs og dæma síðari viðureign Elverum og MT Melsungen í forkeppni Evrópudeildar karla.
Melsungen vann fyrri viðureignina í Kassel í Þýskalandi á laugardaginn, 28:23.
