„Ég er ánægður með karakterinn í mínu liði. Við eltum allan leikinn en gáfumst aldrei upp,“ sagði Andri Snær Stefánsson, þjálfari KA/Þórs þegar handbolti.is leitaði viðbragða hans eftir jafntefli liðs hans við ÍBV, 21:21, í fyrstu umferð Olísdeildar kvenna í Vestmannaeyjum síðdegis.
Rakel Sara Elvarsdóttir jafnaði metin þegar rúmar þrjár mínútur voru til leiksloka, 21:21. Eftir það var ekkert skorað þótt ekki hafi skort möguleika á því.
„ÍBV er með hörkulið, skipað öflugum sóknarmönnum. Okkur tókst að spila frábæra vörn nánast allan leikinn. Hinsvegar er ég frekar svekktur með töpuðu boltana í fyrri hálfleik og öll dauðafærin sem við klikkuðum á í leiknum,“ sagði Andri Snær og bætti við.
„Við eigum að gera betur á þeim vígstöðvum og flæðið sóknarlega var oft ekki gott. Við allavega munum taka fullt af hlutum með okkur út úr þessum leik og vinna áfram í okkar hlutum. Við eigum Stjörnuna á heimavelli um næstu helgi og það verður frábært að spila loksins fyrir okkar fólk. Nú fer undirbúningur á fullt fyrir það verkefni,“ sagði Andri Snær Stefánsson á leiðinni norður á Akureyri með liðinu og eitt stig í farteskinu.
