Harpa Valey Gylfadóttir hefur skrifað undir nýjan samning við handknattleiksdeild Umf. Selfoss til þriggja ára.
Harpa Valey kom til liðs við Selfoss sumarið 2023 frá uppeldisfélagi sínu, ÍBV. Harpa er leikstjórnandi en getur einnig leikið í hægra horni. Á nýliðnu Ragnarsmóti kvenna var hún valin sóknarmaður mótsins.
Á síðasta keppnistímabili skoraði Harpa Valey 73 mörk í 15 leikjum fyrir Selfossliðið í Grill 66-deildinni. Hún hefur leikið 14 A-landsleiki.
„Þegar Harpa kom á Selfoss var það meðal annars til að fá tækifæri til að leika á miðjunni, þar reyndist hún smellpassa inn í lið Selfoss. Það er virkilegt gleðiefni að Harpa velji að taka áfram þátt í uppbyggingu kvennaboltans á Selfossi,“ segir í tilkynningu frá handknattleiksdeild Selfoss í dag.
Selfoss leikur í Olísdeildinni á leiktíðinni sem er nýlega hafin. Næsta viðureign liðsins verður á heimavelli gegn Gróttu á föstudagskvöld.
Leikjdagskrá Olísdeilda.
Olísdeild kvenna.
