Handknattleiksdómararnir Anton Gylfi Pálsson og Jónas Elíasson dæma strax í fyrstu umferð Meistaradeildar Evrópu í karlaflokki annað kvöld. Þeir hafa verið settir á viðureign danska meistaraliðsins Aalborg Håndbold og franska liðsins í HBC Nantes sem fram fer í Sparekassen Danmark Arena í Álaborg.
Beint á ehftv
Fyrir áhugasama þá hefst leikurinn klukkan 16.45 og verður sendur út á ehftv.com. Um er að ræða leik vikunnar í fyrstu umferð Meistaradeildarinnar og því um að ræða talsverða upphefð fyrir Anton Gylfa og Jónas að mæta með spjöld sín og flautur og halda uppi röð og reglu innanvallar.
Auk leiksins í Álaborg fara þrjár viðureignir fram í Meistaradeildinni á morgun. Kolstad, sem Benedikt Gunnar Óskarsson, Sigvaldi Björn Guðjónsson og Sveinn Jóhannsson leika með, tekur á móti Evrópumeisturum Barcelona í Þrándheimi klukkan 16.45.
Tveimur stundum síðar mætast Sporting með Orra Frey Þorkelsson innanborðs og Wisla Plock, sem markvörðurinn Viktor Gísli Hallgrímsson er hjá, í Lissabon. Á sama tíma leiða PSG og Eurofarm Pelister saman kappa sína í París.
