Úrslitavika bikarkeppni HSÍ, Poweradebikarinn, og þar af leiðandi úrslitaleikir keppninnar fara ekki fram í Laugardalshöll á næsta ári. Þetta staðfestir Róbert Geir Gíslason framkvæmdastjóri HSÍ samtali við Handkastið í dag.
Að ósk ÍBR
„Við fengum ósk, innan gæsalappa, frá ÍBR um að úrslitakeppni bikarkeppninnar í handbolta og körfu verði fjarlægð úr Höllinni vegna þess að það falla svo margir æfingatímar niður vegna keppnanna,“ segir Róbert Geir og bætir við að HSÍ ætli sér í útboð á meðal félaganna um að halda bikarhelgina sem reyndar tekur orðið yfir nokkra daga. Félögin geta þar með boðið í að halda viðburðinn. Róbert Geir segist bjartsýnn á að áhugi sé á meðal félaganna að taka viðburðinn að sér.
Góð reynsla frá Ásvöllum
„Við fórum með bikarúrslitin á Ásvelli tvö ár í röð meðan viðgerðir stóðu yfir á Laugardalshöllinni. Þá fundum við fyrir áhuga félaganna að eiga þess kost að taka að sér úrslitaleiki bikarkeppninnar. Ég er þar af leiðandi bjartsýnn á að félögin vilji fá þessa hátíð til sín,“ segir Róbert Geir Gíslason framkvæmdastjóri HSÍ í samtali við Handkastið í dag.
Þáttinn í heild er að finna hér fyrir neðan, umræðan um bikarkeppnina hefst eftir u.þ.b. 19 mínútur.
