„Stigið er afar mikilvægt fyrir okkur. Það hefði verið mjög þungt að ná ekki að minnsta kosti stigi úr þessum leik, ekki síst eftir síðasta leik okkar á undan,“ segir Sólveig Lára Kjærnested þjálfari ÍR eftir jafntefli við ÍBV á heimavelli í þriðju umferð Olísdeildar kvenna í handknattleik í gærkvöld, 22:22. Katrín Tinna Jensdóttir skoraði jöfnunarmark ÍR sem hefur þar með krækt í sitt fyrsta stig í deildinni.
„Mér fannst við sýna virkilega sterkan karakter og standa mjög góða vörn, ekki síst undir lokin. Ég er því ánægð með stelpurnar og stigið,“ sagði Sólveig Lára ennfremur en byrjunin hefur verið erfiðari hjá ÍR-liðinu en vonir stóðu e.t.v. til, ekki síst svíður slakur sóknarleikur gegn Stjörnunni í leiknum á síðasta laugardag. Leikur sem tapaðist með einu marki, 20:19.
ÍR-ingar byrjuðu leikinn gegn ÍBV í gærkvöldi af miklum dug. Þeir voru með þriggja til fimm marka forskot fyrstu 20 mínútur leiksins. Spurð um ástæður þess að forskotið rann liðinu úr greipum fyrir lok fyrir hálfleiks sagði Sólveig Lára klaufaskap vera hluta af skýringunni.
„Við fórum mjög illa að ráði okkur í yfirtölu [manni fleiri], fórum illa með færi, fengum dæmd á okkur skref auk þess sem rangar ákvarðanir voru teknar. Þess utan þá áttum við að geta keyrt meira fram völlinn. Mér fannst við vera óöruggar í hröðum upphlaupum og gerðum óþarfa tæknifeila. Með örlítið betri leik hefði ég viljað fá tvö stig,“ segir Sólveig Lára sem bendir ennfremur á að ÍR hafi á síðasta ári ekki unnið stig í leikjum við ÍBV.
Lengra viðtal er við Sólveigu Láru í myndskeiði efst í fréttinni.
ÍR-ingar kræktu í sitt fyrsta stig
Staðan og næstu leikir í Olísdeildum.
Tek þessu en er ekkert hoppandi kátur
